.

註冊會員登入



誰在線上?

現在有 28 訪客 在線上

寫給在職的弟兄姊妹
作者是 鄭庭展牧師   
週一, 18 十二月 2017 16:20

在職的每一位弟兄姊妹,知道您們辛苦了!今日您們在職場上真的很辛苦:
有返工時間,冇放工時間。
有OT,冇補水。
有同事走,無新同事入,一個人做兩個人嘢。
有薪水加,不過要視乎工作表現,分分鐘增幅追唔上通脹。
升職上流機會少,就算有,都唔想升,唔敢升,因為工作會再多,壓力會再加。
顧客動不動投訴,公司隨時向你問責,心理壓力增,時刻提心吊膽。
進修增值為要提高學歷,因市場競爭大,隨時比人淘汰,讀書只為保住飯碗,再不是為興趣。
有時老闆失驚無神話要做,咁急又冇講點做,只好有得震冇得瞓。
揾客,跑數,老細捽數;再揾客,再跑數,老細再捽數,點死都要死掂條數。
若果有同事玩「攻心計」,辦公室再無朋友,只有你虞我詐,你爭我奪。
每日匆匆忙忙,營營役役,勞心勞力又勞氣,有時真的不知為了甚麼,想辭職唔做,又唔敢,因為要供樓、要養家、要生活。好無奈!好唔想!
………(再講落去,我諗你會好慶,好灰,甚至…好想死!)

弟兄姊妹,我承認現時大部份工作環境都是這樣,有時真的無得選擇,惟有面對現實,我試從四方面比一些意見,希望可以祝福您們。
身:   始終做運動對身體是有好處,無論幾忙,都抽少少時間做運動,就算只喺行路或散步,都要做!人是習慣性動物,你習慣了唔做,就真的唔會做;你習慣了做,就點都會做。我習慣行路去西鐵站,間中晚上散步,師母習慣跳繩,你呢?行為學家觀察研究,建立一個新習慣需要22天,所以你都可以建立運動的習慣。我的中醫朋友在診所的當眼處,全貼上「運動是最好的藥物」。
每日小休很重要。所謂「食飽睡一睡,好過做元帥;食飽抖一抖,好過做特首。」我鼓勵大家,下午吃過飯,若是可以,盡量小休片刻,不要拿手機出來捽,靜靜地閉目養神,相信你下午會充滿力量。有些人習慣「3點3」有小食,我倒建議有小休,讓全身有十五分鐘休息,您們不妨試試。
心:   思想和情緒好重要!唔喺嚇你,若思想情緒一旦出問題,就要用很長時間處理,就算處理好,也較容易再次受傷,所以預防一定勝於治療。我有句話常常提醒自己:「我都喺人一個啫」,所以會做錯嘢、會講錯嘢、會唔記得嘢、會漏咗嘢、會唔識做、會唔知道、會有情緒、會…。記得「放過自己,你都喺人一個啫」,不過,唔喺叫你放Pea自己,更唔喺叫你放縱自己呀!
有句格言:「時間要管理,情緒要處理;問題要梳理,煩惱要清理!」時間很重要,不要等到嚴重才去處理。有想不通便去見輔導員,他們以第三者角度,幫你梳理問題,一步一步處理,煩惱自然清理。若再有需要,就要睇醫生(甚至喺精神科醫生),千祈唔好覺得好醜,有病要睇醫生是好正常的事;若要食精神科藥,就定時食,無需介意,更不要自己停藥。人用奇怪眼光望你,是他的問題,不是你的問題!
「社」與「靈」待續…
在職的弟兄姊妹,深知您們辛苦了!鄭牧師會在私禱中記念您們,求天父爸爸親自顧念您們,加添您們能力去處理繁重的工作,增添您們智慧去面對辦公室的人事張力,賜格外恩典為您們的不足補底,保守您們的家人健康平安,幫助您們的身心社靈皆強壯。
 

 
bottom

核心是 Joomla!. Designed by: site hosting company free domain hosting Valid XHTML and CSS.