未攞到一萬蚊之前，我已計劃用其中一半去買一部平板電腦，其實好想有平板電腦好耐，之前亦都睇啱咗一部S牌的款式，大約要五千蚊左右，但後來心裏面不斷有一句經文提醒我：“白白的得來，也要白白的捨去”，我於是重新計劃點樣使呢一萬蚊。

當然係參與“萬一獻金，支持中心”：中心盤數我好清楚，若果唔籌錢，到年尾可能撐唔住，一間咁蚊型嘅中心，又無名聲又無業績，好難申請到大筆基金，係好靠弟兄姊妹奉獻支持，一路做一路增大自己嘅實力。所以籌款撐住中心，比多啲時間中心去做服務，做好啲業績，儲多啲 Fans。當然，唔知可以撐幾耐，但係中心一路都堅持，一邊做服務一邊傳福音，直到而家都冇違背呢個宗旨。（身體力行，奉獻$1000-，先做榜樣。）
麥皮先生第二年宣教任期開始，不如一次過將全年嘅支持金奉獻出去，唔使逐個月掛住掛住。（$3600-支持麥皮先生買麥皮，正！）
給$500-我家的印尼姐姐。香港人有一萬蚊收，但係喺香港打工幾耐嘅姐姐，都冇得申請，於是我決定同我家姐姐分享，佢攞到500蚊，笑到見牙唔見眼，好開心！佢係應得嘅，因為佢確係一個好姐姐，真係任勞任怨。
2400蚊奉獻給五間基督教機構：
“浸信會神學院”是我的母校，知恩圖報，當然小小哋都要支持啦。
“浸信會聯會”，作為浸信會人，呢幾年見浸聯會是非多多，以致奉獻收入萎縮，所以點都要支持吓。
“施達基金會”，佢哋做好多國際扶貧工作，每年我都會支持，今次都唔例外。最近黎巴嫩大爆炸，佢哋即刻撥款去支持當地嘅醫療及重建工作，我都要支持一份。
“證主協會贈書”，證主每年暑假都會送一套一套屬靈書籍比國內的畢業神學生，而每一套大約有三十幾本，總成本都係500蚊，所以點都要奉獻，能夠支持一個傳道人有三十幾本屬靈參考書，對佢哋日後的事奉幫助非常大。祝福一個牧者，呢個牧者就祝福國內幾百個基督徒，超值，超值！
“日糧事工”，呢間機構出嗰本《靈命日糧》，其實係非常優質嘅靈修小冊子，每一季我都會收到一本，雖然唔係日日睇，但每次攞起嚟睇，就覺得簡而精，一本好嘢！
給$1000-大女凱盈：大女滿了18歲，終於可以開自己嘅銀行戶口，做老豆當然比錢佢開戶口，叫佢學習儲錢同理財。有咗戶口，佢跟住就申請政府一萬蚊，好快被批。我同佢講，要支持中心呀，估唔到佢冇幾耐，攞一千蚊比我，叫我代佢奉獻比中心；佢又話會比啲錢細妹，同佢一齊使喎。其實好多人都好計較同吝惜，為女兒嘅慷慨獻上感恩，老懷安慰。
給$500-細女凱恩。以前時時叫細女要執好佢啲書，要丟咗啲雜物，佢都唔理我，今個暑假佢終於用咗三次，將幼稚園、小學、初中的所有書本雜物一次過執拾，整理，同埋丟哂，嚟個徹底斷捨離。屋企張書枱和書櫃，即刻整齊咗好多。為咗獎勵佢，好樂意比500蚊佢。

最後計埋計埋，剩番十分一比自己，用咗$410買個視像鏡頭裝喺部電腦度，日後開組就可以用電腦，唔使淨係用手機，我老人家睇得清楚啲。剩番五百幾蚊，點使？“民以食為先”，同師母食咗佢囉。
一萬蚊使哂，好開心！好感恩！